BNG-CEDEIRA

Carlos Salgado*
Física e Matemáticas tamén en galego
Para entrar directamente no tema: cal é o esquema mental de quen pensa que non se pode ensinar Fisica e Matematicas en galego? Por que no decreto do galego son estas as asignaturas que hai que dar en castelán? E sobre todo: por que o castelán é máis adecuado?? Doulle voltas a cabeza e non lle atopo resposta. A dificultade das materias máis abstractas non está na lingua que se utiliza para transmitilas, senon nas técnicas, nas capacidades e nos medios de quen as imparte. Un teorema é o mesmo obxecto matemático e require das mesmas destrezas mentais en todas as linguas do mundo. As leis do electromagnetismo tamén.
Somos moitos os que tratamos de dar normalidade ao uso do galego na ciencia: se fixen a miña tese doutoral (en Física de Partículas) en galego non é por reivindicar nada, é por normalidade; se dou clases na Facultade de Fisica en galego é tamén por normalidade; se discuto cos meus colaboradores da nosa investigación en galego (ou inglés, ou francés, ou español ou italiano) é só por normalidade! Que anormalidade é a de decidir que o galego non é para as Matemáticas ou a Física? Por que xusto estas materias?.
No fondo, este esquema mental ten moito de provinciano e despreciativo das propias capacidades. Quen pensa que a Física ou as Matemáticas non se poden ensinar en galego está pensando tamén que un galego non pode aportar nada a esas disciplinas científicas. É similar ao esquema mental imperante, aínda que cada vez menos, no mundo anglosaxón de desprezo polas capacidades científicas dos países latinos, en particular. E é deprimente que este sexa o esquema mental dos responsables da política educativa (e tamén, en parte da científica) deste país. A ciencia transmitese actualmente en inglés (non en español, por certo) mais a capacidade creativa non ten fronteiras idiomáticas. A normalidade no ensino da Física e das Matemáticas, dúas materias con moitas eivas, vai exactamente na dirección contraria. Este é un tiro no pé.

*Naceu en Monforte de Lemos en 1971. Doutorado en Fisica de Particulas na USC e dez anos de investigador no extranxeiro, na Universite de Paris XI, no CERN en Xenebra e na Universita di Roma "La Sapienza". Actualmente está no programa Ramón y Cajal na USC desenvolvendo investigación de relevancia para o colisionador LHC do CERN

Actos:

O portavoz nacional, Guillerme Vázquez, realizará a comezos das vindeira semana unha visita a Catalunya.

Así, o luns impartirá unha conferencia titulada “A nación galega nun Estado plurinacional” ás 19:30 horas na galería Sargadelos de Barcelona, organizada polas fundacións Galiza Sempre e Irla.

Na xornada do martes, manterá un encontro coa Executiva de Esquerra Republicana de Catalunya, encabezada por Joan Puigcercós, logo realizará unha visita institucional ao Parlament de Catalunya, onde compartirá un xantar con consellers nacionalistas, e xa ás 17:30 será recibido por unha delegación galega en Catalunya.

De volta en Galiza, o mércores participará nun acto público en Vigo para presentar as alternativas do BNG fronte a crise económica. Será ás 20:00 horas no Verbum-Casa das Palabras de Vigo.

Web do BNG :

En www.bng-galiza.org dáse conta da posición do BNG sobre a “vía morta” que supón a negociación entre a Xunta e o Goberno central en relación ás caixas de aforro. Infórmase tamén da xuntanza organizada na Coruña con representantes sociais e empresariais da cidade para adherirse ao manifesto Galiza ten Dereito.

 

Ofrécese información, ademais, do encontro mantido por membros das directivas do BNG e da Real Academia Galega, así como das iniciativas presentadas no Senado para conseguir un financiamento estábel para esta institución con cargo aos Orzamentos do Estado.

Dáse conta tamén da visita realizada ás zonas afectadas polo temporal na comarca da Limia, onde o portavoz nacional realizou un percorrido para comprobar a situación das veigas de cereal asolagadas e dos danos causados en naves agrícolas.

Axenda parlamentar :

O Pleno do Parlamento galego, previsto para o martes 16 de marzo a partir das 10:00 horas, terá como punto único o Debate anual de política xeral.

A Comisión VII de Agricultura, Alimentación, Gandaría e Montes celebrarase o xoves a partir das 16:30 horas, na que a deputada Tereixa Paz preguntará pola orde dos proxectos dinamizadores para 2010 e sobre a posíbel venda da fábrica de Puleva en Nadela (Lugo). Presentará, así mesmo, unha proposición non de Lei ante a Comisión sobre o atraso na sinatura do convenio marco para a modernización dos regadíos da Limia.

Cómpre ter en conta que estas son as previsións que coñecemos no feche deste BNG Informa, pois algunhas das ordes do día se deciden os luns e, polo tanto, pode que a axenda parlamentar do BNG sexa aínda máis ampla.

No Congreso dos Deputados

O mércores 17 de marzo, no Pleno do Congreso, Francisco Jorquera interpelará ao Goberno sobre a súa posición á hora de preservar a natureza social e o vínculo territorial das caixas de aforros. A partir das 09:30 horas.

Tamén o mércores, Olaia Fernández Davila preguntaralle ao Goberno sobre a evolución dos prezos do leite en orixe dende os acordos de xullo de 2009 entre industrias, gandeiros e Goberno. Na Comisión de Medio Ambiente, Medio Rural e Mariño a partir das 17:00 horas.

Axenda mediática :

A vindeira semana pódese destacar a presenza na Ser do deputado Bieito Lobeira o luns ás 19.30 horas; na tertulia de Radio Voz estará o deputado Francisco Jorquera o xoves ás 8.30; e na Ser o alcalde de Teo, Martiño Noriega, o venres ás 19:30.